ਟਰਾਈਸਿਟੀ ਵਿੱਚ ਮੈਟਰੋ ਕਾਰੀਡੋਰ ਦਾ ਪਹਿਲਾ ਫੇਜ਼ ਪਿੰਡ ਸਵਾੜਾ ਤੱਕ ਵਧਾਉਣ ਦੀ ਮੰਗ

ਟਰਾਈਸਿਟੀ ਵਿੱਚ ਮੈਟਰੋ ਕਾਰੀਡੋਰ ਦਾ ਪਹਿਲਾ ਫੇਜ਼ ਪਿੰਡ ਸਵਾੜਾ ਤੱਕ ਵਧਾਉਣ ਦੀ ਮੰਗ

ਰੈਜ਼ੀਡੈਂਟ ਵੈੱਲਫੇਅਰ ਸੁਸਾਇਟੀ ਸੈਕਟਰ-110 ਦੇ ਆਗੂਆਂ ਨੇ ਰਾਜਪਾਲ ਨੂੰ ਪੱਤਰ ਲਿਖਿਆ

ਨਬਜ਼-ਏ-ਪੰਜਾਬ, ਮੁਹਾਲੀ, 19 ਦਸੰਬਰ:
ਇੱਥੋਂ ਦੇ ਰੈਜ਼ੀਡੈਂਟ ਵੈੱਲਫੇਅਰ ਸੁਸਾਇਟੀ ਸੈਕਟਰ-110 ਦੇ ਪ੍ਰਧਾਨ ਰਾਜਵਿੰਦਰ ਸਿੰਘ ਸਰਾਓ, ਮੀਤ ਪ੍ਰਧਾਨ ਜਸਵੀਰ ਸਿੰਘ ਗੜਾਂਗ, ਸਰਪ੍ਰਸਤ ਐਮਐਲ ਸ਼ਰਮਾ ਅਤੇ ਅਸ਼ੋਕ ਡੋਗਰਾ, ਏਐਸ ਸੇਖੋਂ, ਹਰਮਿੰਦਰ ਸਿੰਘ ਸੋਹੀ, ਸੰਜੇ ਵੀਰ, ਬੰਤ ਸਿੰਘ ਭੁੱਲਰ ਨੇ ਪੰਜਾਬ ਦੇ ਰਾਜਪਾਲ ਅਤੇ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਨੂੰ ਪੱਤਰ ਲਿਖ ਕੇ ਮੰਗ ਕੀਤੀ ਹੈ ਕਿ ਟਰਾਈਸਿਟੀ ਵਿੱਚ ਬਣਾਏ ਜਾ ਰਹੇ ਮੈਟਰੋ ਕਾਰੀਡੋਰ ਦੇ ਪਹਿਲੇ ਫੇਜ਼ ਨੂੰ ਲਾਂਡਰਾਂ ਜੰਕਸ਼ਨ ਤੋਂ ਸਰਹਿੰਦ ਸੜਕ ’ਤੇ ਪੈਂਦੇ ਪਿੰਡ ਸਵਾੜਾ ਤੱਕ ਵਧਾਇਆ ਜਾਵੇ।
ਆਗੂਆਂ ਨੇ ਕਿਹਾ ਕਿ ਜੋ ਕਾਰੀਡੋਰ ਪਹਿਲੇ ਫੇਜ਼ ਵਿੱਚ ਬਣਾਉਣ ਦੀ ਤਜਵੀਜ਼ ਹੈ, ਉਸ ਵਿੱਚ ਪੰਜਾਬ ਅਤੇ ਮੁਹਾਲੀ ਦੇ ਸ਼ਹਿਰ ਨੂੰ ਅੱਖੋਂ ਪਰੋਖੇ ਕੀਤਾ ਗਿਆ ਹੈ ਜਦੋਂਕਿ ਚੰਡੀਗੜ੍ਹ ਆਉਣ ਜਾਣ ਵਾਲੇ ਜ਼ਿਆਦਾਤਰ ਲੋਕ ਪੰਜਾਬ ਅਤੇ ਮੁਹਾਲੀ ’ਚੋਂ ਲੰਘ ਕੇ ਹੀ ਆਉਂਦੇ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਤੋਂ ਚੰਡੀਗੜ੍ਹ ਆਉਣ ਲਈ ਅਜੋਕੇ ਸਮੇਂ ਦਾ ਮੁੱਖ ਮਾਰਗ ਸਰਹਿੰਦ ਤੋਂ ਵਾਇਆ ਲਾਂਡਰਾਂ-ਮੁਹਾਲੀ ਇੱਕੋ ਇੱਕ ਆਸਾਨ ਰਸਤਾ ਹੈ। ਇਸ ਲਈ ਇਸ ਰਸਤੇ ਨੂੰ ਅੱਖੋਂ ਪਰੋਖੇ ਕਰਨਾ ਪੰਜਾਬ ਵਾਸੀਆਂ ਨਾਲ ਨਾਇਨਸਾਫ਼ੀ ਹੈ।
ਆਗੂਆਂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਤੋਂ ਵੀ ਮੰਗ ਕੀਤੀ ਕਿ ਪੰਜਾਬ ਸਰਕਾਰ ਇਸ ਮਸਲੇ ਨੂੰ ਗੰਭੀਰਤਾ ਨਾਲ ਵਿਚਾਰੇ ਅਤੇ ਇਸ ਸਬੰਧੀ ਬਣਦੀ ਕਾਰਵਾਈ ਨੂੰ ਅਮਲ ਵਿੱਚ ਲਿਆਂਦਾ ਜਾਵੇ। ਉਨ੍ਹਾਂ ਮੁਹਾਲੀ ਹਲਕੇ ਦੇ ਸਿਆਸੀ ਆਗੂਆਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਵੀ ਸਾਰੇ ਪਾਰਟੀਬਾਜ਼ੀ ਤੋਂ ਉੱਤੇ ਉੱਠ ਕੇ ਇਸ ਸਬੰਧੀ ਕੇਂਦਰ ਸਰਕਾਰ ਤੋਂ ਮੰਗ ਕਰਨ ਕਿ ਮੁਹਾਲੀ ਜੋ ਕਿ ਪੰਜਾਬ ਦੀ ਮਿੰਨੀ ਰਾਜਧਾਨੀ ਵਜੋਂ ਜਾਣਿਆ ਜਾਂਦਾ ਹੈ, ਨੂੰ ਵੀ ਪਹਿਲੇ ਫੇਜ਼ ਵਿੱਚ ਹੀ ਮੈਟਰੋ ਨਾਲ ਜੋੜਿਆ ਜਾਵੇ।