ਪਿੰਡ ਅੱਡਾ ਝੁੱਗੀਆਂ ਦੀ ਅੌਰਤ ਨੇ ਜੇਠ ’ਤੇ ਲਾਇਆ ਛੇੜਛਾੜ ਤੇ ਕੁੱਟਮਾਰ ਕਰਨ ਦਾ ਦੋਸ਼, ਜੇਠ ਵਿਰੁੱਧ ਕੇਸ ਦਰਜ

ਪਿੰਡ ਅੱਡਾ ਝੁੱਗੀਆਂ ਦੀ ਅੌਰਤ ਨੇ ਜੇਠ ’ਤੇ ਲਾਇਆ ਛੇੜਛਾੜ ਤੇ ਕੁੱਟਮਾਰ ਕਰਨ ਦਾ ਦੋਸ਼, ਜੇਠ ਵਿਰੁੱਧ ਕੇਸ ਦਰਜ

ਪੀੜਤ ਅੌਰਤ ਆਪਣੇ ਪਰਿਵਾਰ ਨਾਲ ਐਸਐਸਪੀ ਨੂੰ ਮਿਲੀ, ਪੁਲੀਸ ’ਤੇ ਖੱਜਲ ਖੁਆਰ ਦਾ ਦੋਸ਼

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 19 ਅਪਰੈਲ:
ਮੁਹਾਲੀ ਕੌਮਾਂਤਰੀ ਏਅਰਪੋਰਟ ਨੇੜਲੇ ਪਿੰਡ ਅੱਡਾ ਝੁੱਗੀਆਂ ਦੀ ਇੱਕ ਅੌਰਤ ਨੇ ਆਪਣੇ ਜੇਠ ’ਤੇ ਉਸ ਨਾਲ ਕਥਿਤ ਛੇੜਛਾੜ ਅਤੇ ਕੁੱਟਮਾਰ ਕਰਨ ਦਾ ਦੋਸ਼ ਲਾਇਆ ਹੈ। ਪੀੜਤ ਅੌਰਤ ਨੇ ਅੱਜ ਮੁਹਾਲੀ ਵਿੱਚ ਐਸਐਸਪੀ ਹਰਚਰਨ ਸਿੰਘ ਭੁੱਲਰ ਨਾਲ ਮੁਲਾਕਾਤ ਕਰਕੇ ਲਿਖਤੀ ਸ਼ਿਕਾਇਤ ਦਿੱਤੀ ਅਤੇ ਪੁਲੀਸ ’ਤੇ ਖੱਜਲ ਖੁਆਰ ਕਰਨ ਦਾ ਦੋਸ਼ ਲਾਇਆ। ਉਨ੍ਹਾਂ ਕਿਹਾ ਕਿ ਇਹ ਘਟਨਾ ਬੀਤੀ 9 ਅਪਰੈਲ ਦੀ ਹੈ ਪ੍ਰੰਤੂ 10 ਦਿਨ ਬੀਤ ਜਾਣ ਦੇ ਬਾਵਜੂਦ ਪੁਲੀਸ ਨੇ ਕੋਈ ਕਾਰਵਾਈ ਨਹੀਂ ਕੀਤੀ। ਉਧਰ, ਐਸਐਸਪੀ ਨੇ ਪੁਲੀਸ ਨੂੰ ਤੁਰੰਤ ਬਣਦੀ ਕਾਰਵਾਈ ਕਰਨ ਦੇ ਆਦੇਸ਼ ਜਾਰੀ ਕੀਤੇ। ਇਸ ਤਰ੍ਹਾਂ ਐਸਐਸਪੀ ਦੇ ਦਖ਼ਲ ਤੋਂ ਬਾਅਦ ਜ਼ੀਰਕਪੁਰ ਥਾਣੇ ਵਿੱਚ ਪੀੜਤ ਅੌਰਤ ਦੇ ਜੇਠ ਖ਼ਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਪੀੜਤ ਅੌਰਤ ਨੇ ਕਿਹਾ ਕਿ ਉਸ ਦਾ ਜੇਠ ਉਸ ਉੱਤੇ ਮੈਲੀ ਅੱਖ ਰੱਖਦਾ ਹੈ ਅਤੇ ਅਕਸਰ ਮੌਕਾ ਦੇਖ ਕੇ ਉਸ ਨਾਲ ਕਥਿਤ ਛੇੜਛਾੜ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਬੀਤੀ 9 ਅਪਰੈਲ ਨੂੰ ਉਸ ਜੇਠ ਉਨ੍ਹਾਂ ਦੇ ਘਰ ਆਇਆ ਅਤੇ ਉਸ ਨਾਲ ਛੇੜਛਾੜ ਕੀਤੀ ਗਈ। ਜਦੋਂ ਉਹ ਆਪਣੀ ਜੇਠਾਣੀ ਉਲਾਭਾ ਦੇਣ ਗਈ ਤਾਂ ਉਸ ਦੀ ਕੁੱਟਮਾਰ ਕੀਤੀ ਗਈ। ਪੀੜਤ ਅੌਰਤ ਦੇ ਦੱਸਣ ਅਨੁਸਾਰ ਇਸ ਤੋਂ ਪਹਿਲਾਂ ਵੀ ਉਸ ਨਾਲ ਅਜਿਹੀ ਘਟਨਾ ਵਾਪਰ ਚੁੱਕੀ ਹੈ ਅਤੇ ਉਸ ਦਾ ਜੇਠ ਮੁਆਫ਼ੀ ਮੰਗ ਚੁੱਕਾ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਜੇਠ ਦੇ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ ਅਤੇ ਉਸ ਦੀ ਜਾਨ ਮਾਲ ਦੀ ਰੱਖਿਆ ਕੀਤੀ ਜਾਵੇ।
ਉਧਰ, ਦੂਜੇ ਪਾਸੇ ਪੀੜਤ ਅੌਰਤ ਦੀ ਜੇਠਾਣੀ ਨੇ ਉਕਤ ਸਾਰੇ ਦੋਸ਼ਾਂ ਨੂੰ ਬਿਲਕੁਲ ਬੇਬੁਨਿਆਦ ਅਤੇ ਮਨਘੜਤ ਦੱਸਦਿਆਂ ਕਿਹਾ ਕਿ ਉਸ ਦੀ ਦਰਾਣੀ ਨਿਰਾਂ ਝੂਠ ਬੋਲ ਰਹੀ ਹੈ। ਉਨ੍ਹਾਂ ਦੇ ਘਰ ਵਿੱਚ ਅਜਿਹੀ ਕੋਈ ਘਟਨਾ ਨਹੀਂ ਵਾਪਰੀ ਹੈ। ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਉਕਤ ਅੌਰਤ ਜਿਸ ਦਿਨ ਦੀ ਘਟਨਾ ਦੱਸ ਰਹੀ ਹੈ। ਉਸ ਦਿਨ ਉਸ ਦਾ ਪਤੀ ਘਰ ਵਿੱਚ ਮੌਜੂਦ ਹੀ ਨਹੀਂ ਸੀ।