ਗਰੀਬ ਅੌਰਤਾਂ ਲਈ 1 ਮਾਰਚ ਤੋਂ ਹੋਵੇਗੀ ਹੋਮ ਨਰਸਿੰਗ ਸਿਖਲਾਈ ਕੋਰਸ ਦੀ ਸ਼ੁਰੂਆਤ

ਗਰੀਬ ਅੌਰਤਾਂ ਲਈ 1 ਮਾਰਚ ਤੋਂ ਹੋਵੇਗੀ ਹੋਮ ਨਰਸਿੰਗ ਸਿਖਲਾਈ ਕੋਰਸ ਦੀ ਸ਼ੁਰੂਆਤ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 25 ਫਰਵਰੀ:
ਸਮਾਜ ਸੇਵੀ ਸੰਸਥਾ ਭਾਈ ਘਨੱਈਆ ਜੀ ਕੇਅਰ, ਸਰਵਿਸ ਐੱਡ ਵੈਲਫੇਅਰ ਸੁਸਾਇਟੀ ਵੱਲੋਂ 1 ਮਾਰਚ 2020 ਤੋਂ ਗਰੀਬ ਮਹਿਲਾਵਾਂ ਲਈ ਹੋਮ ਨਰਸਿੰਗ ਦਾ ਸਿਖਲਾਈ ਕੋਰਸ ਸ਼ੁਰੂ ਕੀਤਾ ਜਾ ਰਿਹਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਸੁਸਾਇਟੀ ਦੇ ਚੇਅਰਮੈਨ ਕ੍ਰਿਸ਼ਨ ਕੁਮਾਰ ਸੈਣੀ ਨੇ ਦੱਸਿਆ ਕਿ ਇਸ ਪ੍ਰਾਜੈਕਟ ਲਈ ਫੰਡ ਪੰਜਾਬ ਸਰਕਾਰ ਵੱਲੋਂ ਮਦਰ ਐਨਜੀਓ ਸੋਸਵਾਂ ਰਾਹੀਂ ਉਪਲਬਧ ਕਰਵਾਏ ਜਾਣਗੇ।
ਉਹਨਾਂ ਦੱਸਿਆ ਕਿ ਇਸ ਸਿਖਲਾਈ ਕੋਰਸ ਦਾ ਉਪਦੇਸ਼ ਮਹਿਲਾਵਾਂ ਨੂੰ ਉਨ੍ਹਾਂ ਬਜ਼ੁਰਗ ਲੋਕਾਂ ਦੀ ਦੇਖਭਾਲ ਲਈ ਸਿੱਖਿਆ ਪ੍ਰਦਾਨ ਕਰਨਾ ਹੈ, ਜਿਹੜੇ ਗੰਭੀਰ ਬਿਮਾਰ ਹਨ ਜਾਂ ਕਿਸੇ ਬਿਮਾਰੀ, ਹਾਦਸੇ ਕਾਰਨ ਅਪਾਹਿਜ ਹੋ ਚੁੱਕੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਯੋਜਨਾ ਦਾ ਟੀਚਾ ਗਰੀਬ ਮਹਿਲਾਵਾਂ ਨੂੰ ਹੁਨਰ ਵਿਕਾਸ ਰਾਹੀਂ ਆਪਣੇ ਆਪ ਤੇ ਨਿਰਭਰ ਬਨਾਉਣਾ ਹੈ। ਉਨ੍ਹਾਂ ਦੱਸਿਆ ਕਿ 6 ਮਹੀਨੇ ਦੇ ਇਸ ਕੋਰਸ ਵਾਸਤੇ ਰੋਜਾਨਾ 4 ਘੰਟੇ ਕਲਾਸ ਲੱਗੇਗੀ ਅਤੇ ਐਤਵਾਰ ਦੀ ਛੁੱਟੀ ਹੋਵੇਗੀ। 3 ਮਹੀਨੇ ਦੇ ਕੋਰਸ ਪਿੱਛੋਂ ਅਗਲੇ 3 ਮਹੀਨੇ ਸਿੱਖਿਆਰਥੀਆਂ ਨੂੰ ਸਰਕਾਰੀ ਹਸਤਪਾਲ ਵਿਖੇ ਪ੍ਰੈਕਟੀਕਲ ਸਿਖਲਾਈ ਦਿੱਤੀ ਜਾਵੇਗੀ। ਉਹਨਾਂ ਦੱਸਿਆ ਕਿ 18 ਸਾਲ ਤੋੱ ਵੱਧ ਉਮਰ ਦੀਆਂ ਦਸਵੀਂ ਪਾਸ ਲੜਕੀਆਂ ਜਾਂ ਮਹਿਲਾਵਾਂ ਇਸ ਕੋਰਸ ਨੂੰ ਕਰ ਸਕਦੀਆਂ ਹਨ। ਕੋਰਸ ਦੀ ਪ੍ਰਤੀ ਮਹੀਨਾ ਫੀਸ 150 ਰੁਪਏ ਤੈਅ ਕੀਤੀ ਗਈ ਹੈ। ਇਸ ਮੌਕੇ ਸੁਸਾਇਟੀ ਦੇ ਪ੍ਰਧਾਨ ਸੰਜੀਵ ਰਾਬੜਾ ਅਤੇ ਜ਼ਿਲ੍ਹਾ ਯੂਥ ਵੈਲਫੇਅਰ ਸੁਸਾਇਟੀ ਦੇ ਪ੍ਰਧਾਨ ਹਰਦੀਪ ਸਿੰਘ ਬਠਲਾਣਾ ਵੀ ਮੌਜੂਦ ਸਨ।