ਪੰਜਾਬ ਸਕੂਲ ਸਿੱਖਿਆ ਬੋਰਡ ਸੋਮਵਾਰ ਨੂੰ ਕਰੇਗਾ ਬਾਰ੍ਹਵੀਂ ਜਮਾਤ ਦੇ ਮੁਕੰਮਲ ਨਤੀਜੇ ਦੀ ਘੋਸ਼ਣਾ

ਪੰਜਾਬ ਸਕੂਲ ਸਿੱਖਿਆ ਬੋਰਡ ਸੋਮਵਾਰ ਨੂੰ ਕਰੇਗਾ ਬਾਰ੍ਹਵੀਂ ਜਮਾਤ ਦੇ ਮੁਕੰਮਲ ਨਤੀਜੇ ਦੀ ਘੋਸ਼ਣਾ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 6 ਮਈ:
ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਮਾਰਚ 2018 ਵਿੱਚ ਲਈ ਗਈ ਬਾਰ੍ਹਵੀਂ ਸ਼੍ਰੇਣੀ ਦੀ ਸਲਾਨਾ ਪ੍ਰੀਖਿਆ ਦੀ ਵੋਕੇਸ਼ਨਲ ਸਟਰੀਮ, ਐੱਨਐੱਸਕਿਊਐੱਫ, ਮੁੜ ਪ੍ਰੀਖਿਆ ਅਤੇ ਜਿਹੜੇ ਵਿਦਿਆਰਥੀ ਪ੍ਰੀਖਿਆ ਦੇਣ ਤੋਂ ਵਾਂਝੇ ਰਹਿ ਗਏ ਸਨ (ਪ੍ਰੀਖਿਆ ਦੇਣ ਬਾਅਦ) ਉਨ੍ਹਾਂ ਦੇ ਨਤੀਜੇ ਦਾ ਐਲਾਨ 7 ਮਈ ਨੂੰ ਕੀਤਾ ਜਾਵੇਗਾ। ਬੋਰਡ ਦੇ ਚੇਅਰਮੈਨ ਮਨੋਹਰ ਕਾਂਤ ਕਲੋਹੀਆ ਨੇ ਮੀਡੀਆ ਨੂੰ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਬਾਰ੍ਹਵੀਂ ਦੇ ਮੁਕੰਮਲ ਨਤੀਜੇ ਦੇ ਐਲਾਨ ਨਾਲ ਬਾਰ੍ਹਵੀਂ ਦੇ ਵਿਦਿਆਰਥੀਆਂ ਦੀ ਮੈਰਿਟ ਸੂਚੀ ਵੀ ਸੋਮਵਾਰ ਨੂੰ ਜਾਰੀ ਕੀਤੀ ਜਾਵੇਗੀ ।
ਬੋਰਡ ਚੇਅਰਮੈਨ ਸ੍ਰੀ ਕਲੋਹੀਆ ਨੇ ਅੱਗੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਬਾਰ੍ਹਵੀਂ ਦੇ ਸਾਇੰਸ, ਕਾਮਰਸ, ਹਿਊਮੈਨਟੀਜ਼ ਅਤੇ ਓਪਨ ਸਕੂਲ ਦੇ ਵਿਦਿਆਰਥੀਆਂ ਦੇ ਨਤੀਜੇ ਦਾ ਐਲਾਨ ਭਾਵੇਂ 23 ਅਪਰੈਲ ਨੂੰ ਕਰ ਦਿੱਤਾ ਗਿਆ ਸੀ, ਪਰ ਬਾਰ੍ਹਵੀਂ ਦੀਆਂ ਬਾਕੀ ਰਹਿੰਦੀਆਂ ਸਟਰੀਮਾਂ ਦਾ ਨਤੀਜਾ ਅਤੇ ਮੈਰਿਟ ਸੂਚੀ ਆਉਣੀ ਅਜੇ ਬਾਕੀ ਸੀ। ਬੋਰਡ ਚੇਅਰਮੈਨ ਦੇ ਦੱਸਿਆ ਕਿ ਬਾਰ੍ਹਵੀਂ ਦੇ ਐਲਾਨੇ ਜਾ ਰਹੇ ਮੁਕੰਮਲ ਨਤੀਜੇ ਨੂੰ 8 ਮਈ ਨੂੰ ਦੁਪਹਿਰ ਤੋਂ ਬੋਰਡ ਦੀ ਵੈੱਬਸਾਈਟ www.pseb.ac.in ਅਤੇ www.indiaresults.com ’ਤੇ ਸਕੂਲ ਕੋਡ ਜਾਂ ਆਪਣੇ ਰੋਲ ਨੰਬਰ ਰਾਹੀਂ ਦੇਖਿਆ ਜਾ ਸਕੇਗਾ।