SDM checked attendance of the teachers and mid-day meal in Government school Desumajra

ਐਸਡੀਐਮ ਵੱਲੋਂ ਸਰਕਾਰੀ ਸਕੂਲ ਦੇਸੂਮਾਜਰਾ ਵਿੱਚ ਮਿੱਡ ਡੇਅ ਮੀਲ ਤੇ ਅਧਿਆਪਕਾਂ ਦੀ ਹਾਜ਼ਰੀ ਕੀਤੀ ਚੈੱਕ

ਨਬਜ਼-ਏ-ਪੰਜਾਬ ਬਿਊਰੋ, ਖਰੜ, 27 ਅਪਰੈਲ:
ਖਰੜ ਦੀ ਐਸ.ਡੀ.ਐਮ ਸ੍ਰੀਮਤੀ ਅਮਨਿੰਦਰ ਕੌਰ ਬਰਾੜ ਨੇ ਅੱਜ ਇੱਥੋਂ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ ਦੇਸੂਮਾਜਰਾ ਅਤੇ ਸਰਕਾਰੀ ਹਾਈ ਸਕੂਲ ਦੇਸੂਮਾਜਰਾ ਵਿੱਚ ਮਿਡ-ਡੇ-ਮੀਲ ਦੇ ਪ੍ਰਬੰਧਾਂ ਅਤੇ ਅਧਿਆਪਕਾਂ ਦੀ ਹਾਜ਼ਰੀ ਚੈੱਕ ਕੀਤੀ। ਉਨ੍ਹਾਂ ਕਿਹਾ ਕਿ ਜੇਕਰ ਸਕੂਲਾਂ ਵਿੱਚ ਮਿਡ ਡੇਅ ਮੀਲ ਸਕੀਮ ਤਹਿਤ ਦੁਪਹਿਰ ਦੇ ਖਾਣੇ ਵਿੱਚ ਦਿੱਤੇ ਜਾਣ ਵਾਲੇ ਭੋਜਨ ਵਿੱਚ ਕਿਸੇ ਪ੍ਰਕਾਰ ਦੀ ਕੋਈ ਤਰੁੱਟੀ ਪਾਈ ਜਾਂਦੀ ਹੈ ਤਾਂ ਸਬੰਧਤ ਠੇਕੇਦਾਰ ਖਿਲਾਫ ਕਾਰਵਾਈ ਕੀਤੀ ਜਾਵੇਗੀ ਅਤੇ ਕਿਸੇ ਨੂੰ ਬਖਸਿਆ ਨਹੀ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਪ੍ਰਾਇਮਰੀ ਸਕੂਲ ਵਿਚ ਠੇਕੇਦਾਰ ਵਲੋਂ ਮਿਡ ਡੇ ਮੀਲ ਸਪਲਾਈ ਕੀਤੀ ਜਾ ਰਿਹਾ ਹੈ, ਜਿਥੇ ਕਿ ਰੋਟੀ ਤੇ ਕੜੀ ਭੇਜੀ ਗਈ ਸੀ ਜੋ ਕਿ ਸਹੀ ਨਹੀਂ ਸੀ। ਉਨ੍ਹਾਂ ਸਕੂਲ ਦੀ ਹੈਡ ਟੀਚਰ ਨੂੰ ਵੀ ਪੁੱਛਿਆ ਕਿ ਮੀਨੂੰ ਅਨੁਸਾਰ ਖਾਣਾ ਭੇਜਿਆ ਜਾਂਦਾ ਹੈ ਕਿ ਨਹੀਂ ਅਤੇ ਡਲੀਵਰ ਸਮੇ ਕਾਰਡ ਵਿਚ ਟਿੱਪਣੀ ਲਿਖੀ ਜਾਂਦੀ ਹੈ ਕਿ ਨਹੀਂ। ਉਨ੍ਹਾਂ ਕਿਹਾ ਕਿ ਸਰਕਾਰੀ ਹਾਈ ਸਕੂਲ ਦੇਸੂਮਾਜਰਾ ਵਿਚ ਖਾਣਾ ਤਿਆਰ ਕੀਤਾ ਗਿਆ ਸੀ ਜੋ ਕਿ ਸਹੀ ਸੀ। ਉਨਾਂ ਦਸਿਆ ਕਿ ਠੇਕੇਦਾਰ ਵਲੋਂ ਭੇਜੇ ਜਾ ਰਹੇ ਖਾਣੇ ਸਬੰਧੀ ਰਿਪੋਰਟ ਡਿਪਟੀ ਕਮਿਸ਼ਨਰ ਐਸ ਏ ਐਸ.ਨਗਰ ਨੂੰ ਭੇਜੀ ਜਾ ਰਹੀ ਹੈ ਤਾਂ ਕਿ ਅੱਗੋ ਲਈ ਸਕੂਲਾਂ ਵਿਚ ਬੱਚਿਆਂ ਲਈ ਵਧੀਆਂ ਖਾਣਾ ਸਪਲਾਈ ਹੋ ਸਕੇ। ਇਸ ਮੌਕੇ ਹਾਈ ਸਕੂਲ ਦੇ ਮੁੱਖ ਅਧਿਆਪਕ ਸੋਹਨ ਸਿੰਘ, ਅਧਿਆਪਕ ਸਤਵੰਤ ਕੌਰ, ਰਾਜਵਿੰਦਰ ਕੌਰ, ਪ੍ਰਾਇਮਰੀ ਸਕੂਲ ਦੀ ਮੁੱਖ ਅਧਿਆਪਕ ਮੰਜੂ ਬਾਲਾ, ਐਸ.ਡੀ.ਐਮ.ਦਫਤਰ ਦੇ ਸੰਜੀਵ ਕੁਮਾਰ ਸਮੇਤ ਹੋਰ ਸਟਾਫ ਮੈਂਬਰ ਹਾਜ਼ਰ ਸਨ।