ਲੈਕਚਰਾਰ ਕਾਰਡਰ ਦੀ ਸੀਨੀਆਰਤਾ ਸੂਚੀ ਹਾਈ ਕੋਰਟ ਦੇ ਫ਼ੈਸਲੇ ਤੇ ਵਿਭਾਗੀ ਨਿਯਮਾਂ ਅਨੁਸਾਰ ਸਹੀ: ਦੁੱਗਾਂ, ਨਬੀਪੁਰ

ਲੈਕਚਰਾਰ ਕਾਰਡਰ ਦੀ ਸੀਨੀਆਰਤਾ ਸੂਚੀ ਹਾਈ ਕੋਰਟ ਦੇ ਫ਼ੈਸਲੇ ਤੇ ਵਿਭਾਗੀ ਨਿਯਮਾਂ ਅਨੁਸਾਰ ਸਹੀ: ਦੁੱਗਾਂ, ਨਬੀਪੁਰ

ਨਬਜ਼-ਏ-ਪੰਜਾਬ, ਚੰਡੀਗੜ੍ਹ, 3 ਸਤੰਬਰ:
ਐੱਸਸੀ/ਬੀਸੀ ਅਧਿਆਪਕ ਯੂਨੀਅਨ ਪੰਜਾਬ ਦੀ ਜ਼ਰੂਰੀ ਤੇ ਅਹਿਮ ਮੀਟਿੰਗ ਕਰਿਸ਼ਨ ਸਿੰਘ ਦੁੱਗਾਂ ਸੂਬਾ ਪ੍ਰਧਾਨ ਦੀ ਅਗਵਾਈ ਹੇਠ ਹੋਈ। ਜਿਸ ਵਿੱਚ ਜਥੇਬੰਦੀ ਦੇ ਸੂਬਾ ਜਨਰਲ ਸਕੱਤਰ ਲਛਮਣ ਸਿੰਘ ਨਬੀਪੁਰ, ਸੀਨੀਅਰ ਮੀਤ ਪ੍ਰਧਾਨ ਗੁਰਸੇਵਕ ਸਿੰਘ ਕਲੇਰ, ਸੀਨੀ. ਮੀਤ ਪ੍ਰਧਾਨ ਪਰਵਿੰਦਰ ਭਾਰਤੀ, ਹੋਰ ਆਗੂ ਸਾਹਿਬਾਨ ਅਤੇ ਸੀਨੀਅਰ ਲੈਕਚਰਾਰ ਸਾਥੀ ਸ਼ਾਮਿਲ ਹੋਏ। ਜਨਰਲ ਸਕੱਤਰ ਲਛਮਣ ਸਿੰਘ ਨਬੀਪੁਰ ਨੇ ਦੱਸਿਆ ਕਿ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਵੱਲੋਂ ਮਾਸਟਰ ਕਾਰਡਰ ਅਤੇ ਲੈਕਚਰਾਰ ਕਾਰਡਰ (2015) ਦੀਆਂ ਗਲਤ ਸੀਨੀਅਰਤਾ ਸੂਚੀਆਂ ਰੱਦ ਕਰਕੇ ਨਵੇਂ ਸਿਰਿਓਂ 1978 ਦੇ ਸੇਵਾ ਨਿਯਮਾਂ ਅਨੁਸਾਰ ਬਣਾਉਣ ਦਾ ਫ਼ੈਸਲਾ ਦਿੱਤਾ ਗਿਆ ਸੀ।
ਸਿੱਖਿਆ ਵਿਭਾਗ ਵੱਲੋਂ ਕੋਰਟ ਦੇ ਆਦੇਸ਼ਾਂ ਦੀ ਪਾਲਣਾ ਕਰਦੇ ਹੋਏ ਮਾਸਟਰ ਕਾਰਡਰ ਅਤੇ ਲੈਕਚਰਾਰ ਕਾਰਡਰ ਦੀ ਸੀਨੀਅਰਤਾ ਸੂਚੀ ਨੂੰ ਸੋਧਿਆ ਗਿਆ। ਕਿਉਂਕਿ ਲੈਕਚਰਾਰ ਕਾਰਡਰ ਦੀ 2015 ਸੂਚੀ ਵਿੱਚ ਗੰਭੀਰ ਉਣਤਾਈਆਂ ਸਨ। ਜਿਵੇਂ 2015 ਵਾਲੀ ਸੀਨੀਅਰਤਾ ਸੂਚੀ ਵਿੱਚ 1993, 94, 95, 96 ਅਤੇ 97 ਵਿੱਚ ਤਰੱਕੀ ਪ੍ਰਾਪਤ ਕਰਨ ਵਾਲੇ ਲੈਕਚਰਾਰਾਂ ਨਾਲੋਂ ਦਹਾਕੇ ਬਾਅਦ ਵਿਭਾਗ ਵਿੱਚ ਸਿੱਧੀ ਭਰਤੀ ਰਾਹੀਂ ਬਤੌਰ ਲੈਕਚਰਾਰ ਹਾਜ਼ਰ ਹੋਣ ਵਾਲੇ ਹਜ਼ਾਰਾਂ ਲੈਕਚਰਾਰਾਂ ਨੂੰ ਸੀਨੀਅਰ ਬਣਾਇਆ ਗਿਆ ਭਾਵੇਂ ਕਿ ਵਿਭਾਗੀ ਜਾਂ ਕਾਨੂੰਨੀ ਤੌਰ ’ਤੇ ਅਜਿਹੀ ਕੋਈ ਵਿਵਸਥਾ ਨਹੀਂ ਹੈ। ਇੱਥੇ ਹੀ ਬਸ ਨਹੀਂ ਉਨ੍ਹਾਂ ਨੂੰ ਬਤੌਰ ਪ੍ਰਿੰਸੀਪਲ ਤਰੱਕੀਆਂ ਵੀ ਦਿੱਤੀਆਂ ਗਈਆਂ ਹਨ। ਜਦੋਂਕਿ 25-30 ਸਾਲ ਤੋਂ ਬਤੌਰ ਲੈਕਚਰਾਰ ਸੇਵਾ ਨਿਭਾਅ ਰਹੇ ਸੀਨੀਅਰ ਲੈਕਚਰਾਰ ਤਰੱਕੀ ਦੀ ਉਡੀਕ ਕਰਦੇ-ਕਰਦੇ ਸੇਵਾ ਮੁਕਤ ਹੋ ਗਏ ਜਾਂ ਹੋ ਰਹੇ ਹਨ।
ਮਨਮਰਜੀ ਕਰਦੇ ਹੋਏ ਗਲਤ ਢੰਗ ਨਾਲ ਕੈਚ-ਡਾਊਨ ਦਾ ਫਾਰਮੂਲਾ ਲਗਾ ਕੇ (ਜਿਸ ਦੀ ਕੋਈ ਕਾਨੂੰਨੀ ਵਿਵਸਥਾ ਨਹੀਂ) ਸੀਨੀਅਰ ਐੱਸਸੀ ਲੈਕਚਰਾਰਾਂ ਨੂੰ ਹਜ਼ਾਰਾ ਅੰਕ ਪਿੱਛੇ ਧੱਕਿਆ ਗਿਆ। ਜਰਾ ਸੋਚੋ ਕਿ ਇਹ ਤਰਕਸੰਗਤ ਹੈ ਕਿ ਅਜਿਹਾ ਵਿਅਕਤੀ ਜਿਸ ਨੇ ਆਪਣੀ ਲੈਕਚਰਾਰ ਦੀ ਯੋਗਤਾ ਵੀ ਅਤੇ ਤਰੱਕੀ ਵੀ ਐੱਸਸੀ ਲੈਕਚਰਾਰ ਨਾਲੋਂ 10-15 ਸਾਲ ਬਅਦ ਵਿੱਚ ਪ੍ਰਾਪਤ ਕੀਤੀ ਹੋਵੇ, ਉਹ ਐੱਸਸੀ ਲੈਕਚਰਾਰ ਤੋਂ ਸੀਨੀਅਰ ਬਣਾ ਦਿੱਤਾ ਗਿਆ ਹੋਵੇ? ਪਰ 2015 ਵਾਲੀ ਲੈਕਚਰਾਰ ਕਾਰਡਰ ਦੀ ਸੀਨੀਅਰਤਾ ਸੂਚੀ ਵਿੱਚ ਇੱਕ ਨਹੀਂ ਹਜ਼ਾਰਾਂ ਉਦਾਹਰਣਾਂ ਮਿਲਦੀਆਂ ਹਨ।
ਕੁੱਝ ਉਹ ਸਾਥੀ ਜਿਨ੍ਹਾਂ ਨੂੰ ਉੱਕਤ ਗਲਤ ਢੰਗ-ਤਰੀਕਿਆਂ ਰਾਹੀਂ 2015 ਵਾਲੀ ਸੀਨੀਅਰਤਾ ਸੂਚੀ ਵਿੱਚ ਸੀਨੀਅਰ ਬਣਾ ਦਿੱਤਾ ਗਿਆ ਸੀ ਪਰ ਪੰਜਾਬ ਤੇ ਹਰਿਅਣਾ ਹਾਈ ਕੋਰਟ ਦੇ ਆਦੇਸ਼ਾਂ ਅਤੇ ਵਿਭਾਗੀ ਨਿਯਮਾਂ ਅਨੁਸਾਰ 21-08-2025 ਨੂੰ ਜਾਰੀ ਕੀਤੀ ਲੈਕਚਰਾਰ ਕਾਡਰ ਦੀ ਪ੍ਰੋਵੀਜਨਲ ਸੀਨੀਆਰਤਾ ਸੂਚੀ ਵਿੱਚ ਉਨ੍ਹਾਂ ਨੂੰ ਸਹੀ ਸੀਨੀਅਰਤਾ ਨੰਬਰ ਦਿੱਤਾ ਗਿਆ ਹੈ ਅਤੇ ਉਹ ਸੀਨੀਅਰ ਲੈਕਚਰਾਰਾਂ ਤੋਂ ਪਿੱਛੇ ਚਲੇ ਗਏ ਹਨ। ਇਸ ਲਈ ਉਹ ਸਾਥੀ 21/8/2025 ਵਾਲੀ ਸੀਨੀਅਤਾ ਸੂਚੀ ਗਲਤ ਹੋਣ ਬਾਰੇ ਤਰਕਹੀਣ ਵਿਰੋਧ ਕਰ ਰਹੇ ਹਨ। ਇਨ੍ਹਾਂ ਸਾਥੀਆਂ ਨੂੰ ਸਮਝਣਾ ਚਾਹੀਦਾ ਹੈ ਕਿ ਉਨ੍ਹਾਂ ਨੂੰ ਪਹਿਲਾਂ ਅੱਗੇ ਦਿੱਤਾ ਗਿਆ ਸੀਨੀਅਰਤਾ ਨੰਬਰ ਗਲਤ ਸੀ।ਫਿਰ ਵੀ ਜੇਕਰ ਕਿਸੇ ਸਾਥੀ ਦਾ ਇਤਰਾਜ ਹੈ ਤਾਂ ਸਬੂਤਾਂ ਸਹਿਤ ਇਤਰਾਜ ਰੱਖਕੇ ਉਸ ਨੂੰ ਦੂਰ ਕਰਵਾਇਆ ਜਾ ਸਕਦਾ।
ਵਰਨਾ ਦਹਾਕੇ ਬਾਅਦ ਪੰਜਾਬ ਤੇ ਹਰਿਅਣਾ ਹਾਈਕੋਰਟ ਦੇ ਹੁਕਮਾਂ ਅਨੁਸਾਰ ਬਣੀ ਸਹੀ ਸੀਨੀਅਰਤਾ ਸੂਚੀ ਦਾ ਬੇਲੋੜਾ ਤਰਕਹੀਣ ਵਿਰੋਧ ਸੀਨੀਅਰ ਲੈਕਚਰਾਰਾਂ ਨੂੰ ਬਣਦੀ ਤਰੱਕੀ ਤੋਂ ਵਾਂਝੇ ਕਰਨ ਦਾ ਹੀ ਸਬੱਬ ਹੋ ਨਿੱਬੜੇਗਾ ਜਦੋਂ ਕਿ ਸੀਨੀਅਰ ਲੈਕਚਰਾਰ ਦਹਾਕਾ ਪਹਿਲਾਂ ਤੋਂ ਬਤੌਰ ਪ੍ਰਿੰਸੀਪਲ ਤਰੱਕੀ ਦੇ ਹੱਕਦਾਰ ਬਣਦੇ ਹਨ। ਇਸ ਲਈ ਅਸੀਂ ਕੋਰਟ ਦੇ ਆਦੇਸ਼ਾਂ ਅਤੇ ਵਿਭਾਗੀ ਨਿਯਮਾਂ ਅਨੁਸਾਰ ਸਹੀ ਬਣੀ ਸੀਨੀਆਰਤਾ ਸੂਚੀ ਦਾ ਤਰਕਹੀਨ ਵਿਰੋਧ ਕਰਨ ਵਾਲੇ ਸਾਥੀਆਂ ਨੂੰ ਅਪੀਲ ਕਰਦੇ ਹਾਂ ਕਿ ਵਿਰੋਧ ਕਰਨ ਤੋਂ ਪਹਿਲਾਂ ਵਿਭਾਗੀ ਨਿਯਮਾਂ ਅਤੇ ਅਦਾਲਤੀ ਫ਼ੈਸਲਿਆਂ ਨੂੰ ਚੰਗੀ ਤਰ੍ਹਾਂ ਘੋਖ ਲੈਣ।
ਐੱਸਸੀ/ਬੀਸੀ ਅਧਿਆਪਕ ਯੂਨੀਅਨ ਪੰਜਾਬ ਡਾਇਰੈਕਟਰ ਸਕੂਲ ਸਿੱਖਿਆ (ਸੈਕੰਡਰੀ ) ਤੋਂ ਮੰਗ ਕਰਦੀ ਹੈ ਕਿ ਪ੍ਰਾਪਤ ਸਹੀ ਤੇ ਯੋਗ ਇਤਰਾਜਾਂ ਨੂੰ ਦੂਰ ਕਰਨ ਉਪਰੰਤ ਜਲਦੀ ਲੈਕਚਰਾਰ ਕਾਰਡਰ ਦੀ ਸੀਨੀਅਰਤਾ ਸੂਚੀ ਨੂੰ ਅੰਤਿਮ ਰੂਪ ਦਿੱਤਾ ਜਾਵੇ ਅਤੇ ਪ੍ਰਿੰਸੀਪਲ ਵਜੋਂ ਤਰੱਕੀਆਂ ਕਰ ਕੇ ਇਨਸਾਫ਼ ਦਿੱਤਾ ਜਾਵੇਗਾ। ਇਸ ਮੀਟਿੰਗ ਵਿੱਚ ਲੈਕਚਰਾਰ ਹਰਬਿਲਾਸ ਬੰਗਾ, ਹਰਚੰਦ ਸਿੰਘ ਬੱਲ, ਰਾਮ ਪ੍ਰਕਾਸ ਸਿੰਘ, ਹਰਮੇਸ਼ ਕੁਮਾਰ, ਵਿੱਤ ਸਕੱਤਰ ਬੇਅੰਤ ਭਾਂਬਰੀ, ਹਰਜਿੰਦਰ ਸਿੰਘ ਪੁਰਾਣੇਵਾਲਾ, ਸੁਪਿੰਦਰ ਸਿੰਘ ਫਤਹਿਗੜ੍ਹ ਸਾਹਿਬ, ਕੁਲਵਿੰਦਰ ਬਿੱਟੂ, ਹਰਵਿੰਦਰ ਮਾਰਸ਼ਲ, ਕੰਵਲਜੀਤ ਭਵਾਨੀਗੜ੍ਹ, ਕਰਮਜੀਤ ਸਿੰਘ, ਨਰਿੰਦਰਪਾਲ ਸਿੰਘ, ਪ੍ਰੇਮ ਮੌਲਵੀਵਾਲਾ, ਬਲਵਿੰਦਰ ਘੱਗਾ, ਸ਼ਮਸ਼ੇਰ ਨਿਆਲ, ਹਰਜਿੰਦਰ ਅਰਜ਼, ਅਮਨਦੀਪ ਸਾਹੋਕੇ ਆਦਿ ਸ਼ਾਮਲ ਹੋਏ।